Toqu qaqortuuvoq

Gaaba qatanngutaalu sikumi pallungapput. Taqissorlutik arriitsunnguamik puisip tungaanukarput. Inuusoqigamik piniarnermillu misilittagaqarpiaratik, inuunermilumi misilittagaqarpiannginnamik, malunnanngisaarluinnarlutik puisi qanilliartorpaat, ilami pisarinissaa qulakkeerusunnermik.

Marluullutik aputisiutinik isaruaqarput, taakkulu isitaat ima mikitigaat, siku iluamik isigisinnaanagu. Seqinermi aamaruluttuinnaavoq.

Qaammatialuit matuma siornatigut nunaqarfeeqqami ajunaarnersuaqarpoq. Nunaqarfeeqqap piniartui misilittagaqarluartut pingasut ajunaarput. Kangerluup iluanut qajartorsimapput, iluliarsuaq assakarmat. Malissuarmit pisarineqarput. Maanna Gabba, qatanngutaa inuusuttuaqqallu arlaqanngitsut kisimik piniartussamaataalerput. Kaannersuaqannginnissaa pinngitsoorteqqarpaat.

Gabbap malugaa pissanganermik uummatini tilleruluttoq. Puisi qanillivippaat, ima qanitsigaat naaleriaannaallutik. Puisi uninngaannarpoq – toqup qanoq qanitsiginera eqqarsaatiginngivillugu.

Tassanngaannaq ilimaginngeqqissaakkaminnik, nannumik nutaqqamik tunuminniit saassutsipput. Gabbap qatanngutaa Nannup uisorernerinnarmi qungasiatigut qaqqorpaa, kaleriarlugulu qimallugu. Suna tamarmi nipeqanngitsumik sukkasoorujussuarmillu ingerlavoq, Gabballu qanoq pisoqarnera paasinngitsuungajappaa – isarussami aputisiutit quppartaatigut amitsuararsuakkut taamaallaat takuaa, qatanngummi timaa nannup uniaraa.

Tamatuma kingorna Gabba napparsimasorujussuanngorpoq. Sukkulluunniit anniaateqanngilaq kissarneqaranilu. Meriarneq ajorpoq, kisiannili aamma nerineq ajorluni. Sininneq ajorpoq, ajortikkiartuinnarlunilu. Nallanngavimmi innangaannartarpoq maangaannarlu nakkussisarluni, siunertaqaraniluunniit uniffeqarani angalaarusaartarpoq. Ilaasa tamarmik ikiorniaraluarpaat – erinarsorfigisarpaat qitiffigisarlugulu, nuannersunillu allanik iliuuseqarfigisarlugu, iluaqutaanngilarli.

Unnuat ilaanni, taarnerpaaffimmi pisoqarpoq. Gabba takunnilerpoq. Unnuit siulii assingalugit, unnuami tassani, sikumi pisimasoq annilaarnartoq eqqarsaatimigut misigeqqittuusivaa. Unnuamili tassani – misigisaqartuusinerup ajorluinnartup nalaani, ersarilluinnartumik malugilerpaa, soorlu ullukkut qaamasutut, isarussani sikusiutini kiinaminiit peeriartuaartut. Namminneerlutik silaannarmi ingerlaarusaarput, kiinaatalu saani qangatallutik unillutik. Kingorna isaruai nammineq sangujartulerput, kiinaatalu tungaanut arriitsunnguamik aallaqqillutik.

Isaruai isaatigut isumaanut iserput, eqqarsaatinilu ersarilluinnartumik takusinnaalerpai. Tassanerpiaq paasilerpaa toqu qaqortuusoq. Soorlu pujoq qaqortoq nillerujuttoq aalariartitsisinnaajunnaartorlu, isumaata iluani arriitsunnguamik siaruaakkiartorsimasoq, allaat eqqarsaatit misigissutsillu iluaqutaasussaagaluit takusinnaajunnaarlugit. Gabbap inunngorneranut tunngaviuvoq, inuunissaa. Tamanna tunngavittut atussallugu ajornanngilluinnarpoq. Ullut tamaasa, namminermut allanullu pisinnaasani sinnernaveersaarlugit inuuinnartussaavoq, allamillu naamik. Toqup pujuata maanna suna tamaat matungajassimavaa, soorlu isarussatut aputisiutitut, taamaasilluni takusassaanik takunnissinnaajunnaarsillugu, iliuuseqarsinnaajunnaarsillugulu.

Tassanerpiaq paasilerpaa toqu qaqortuusoq, toqulu qamannga pinngortuusoq. Innanngavimminit nikuippoq, tasitsaariarlunilu silamut anillalluni. Tallini arsarnerit tungaannut siaarpai nipaatsumillu oqarluni: - Qujanaq. Kingornalu aqagumut aalisaatissani piareersariartorpaa.

 
Tak til ©   TCsART for brug af smuk illustration.

Tak til © TCsART for brug af smuk illustration.